2019 онд Монголын шатарчдын дунд бахархмаар, тэмдэглүүштэй үйл явдал тохиолдсон нь Даваадэмбэрэлийн Номин-Эрдэнэ хэмээх 19-хөн настай охин Олон улсын шатрын холбоо /ФИДЕ/-ны шинэчилсэн чансаагаар шатрын ертөнцийн хамгийн дээд цол эрэгтэйчүүдийн ангиллын Их мастерын болзлыг биелүүлсэн явдал байсан юм.

Түүнчлэн тэрээр 2015 онд шатрын спортын эмэгтэй ангиллын их мастер болон эрэгтэй ангиллын олон улсын мастер 2 цолыг нэг жилд хамтад нь хүртсэн Дэлхийн анхны мэргэжлийн эмэгтэй шатарчин юм.

Номин-Эрдэнэ одоо Унгар улсдаа амьдарч, бэлтгэл сургуулилтаа үргэлжлүүлсээр байна. Ингээд бид өдгөө 22 настай Номин-Эрдэнэтэй уулзаж түүний нэг өдөртэй танилцан, ирээдүйн төлөвлөгөө, ойрын зорилгынх нь талаар ярилцсан юм.

Аав үеэл ах хоёрынхоо шатар тоглохыг шимтэн харж буйг нь анзаарсанаар таван настай Номин-Эрдэнийг дасгалжуулагч Х.Эрдэнэдоржид шавь оруулж байжээ.

Тэрээр шатар тоглоод хоёр сар болж байхдаа л өсвөрийн тэмцээнд орж алтан медаль хүртэж байсан бөгөөд 2006 онд ОХУ-д болсон Хүүхдийн их наадмын мөнгөн медалиар анхны олон улсын тэмцээний амжилтаа эхлүүлжээ.

10 настайдаа өсвөрийн дэлхийн аварга болж, 14 настай Олон улсын мастер, Эмэгтэйчүүдийн Их мастер цолуудыг хүртэж, энэ цол хамгийн залуудаа хүртсэн Монголын эмэгтэй шатарчин болсон түүхтэй.

Номин-Эрдэнийн ирээдүй, бэлтгэл сургуулилалтыг сайжруулахаар Унгар улс руу гэр бүлээрээ нүүх шийдвэрийг гаргасан Аав Даваадэмбэрэл нь шатрын спортын дэд мастер цолтой.

Түүний удаах охин Нандин-Эрдэнэ нь мөн гурван настайгаасаа шатар тоглож эхэлсэн бөгөөд, Унгарын Өвсрийн шатрын аварга шалгаруулах тэмцээнд түрүүлсэн байна.

Оюуны спортын төрөлд Монголынхоо нэрийг дэлхийд ийнхүү дуурсгаж буй Номин-Эрдэний тэвчээр хатуужил, сахилга бат, хөдөлмөр зүтгэл, мөн эх орноо гэсэн сэтгэлээр бахархахын зэрэгцээ түүний гэр бүл шатрын спортыг тууштай олон жил дэмжсээр ирсэн нь бахархал, хүндэтгэл төрүүлж байлаа.

Мэдээ бэлтгэсэн : С.Бүжинлхам, Т.Золжаргал