Унгар улс улс тунхагласны баяр мөн Гэгээн Стефан хааны өдрийг жил бүрийн 08.20-ны өдөр тэмдэглэдэг билээ. Гэгээн Стефан нь Унгарын эзэнт гүрнийг үндэслэгч, анхны эзэн хаан, анхны адислагдсан гэгээнтэн бөгөөд 1083 оны 8-р сарын 20-ны өдөр Ромын пап Стефан хааныг адислаж, “Гэгээн” цол олгож байжээ. Иймээс энэхүү өдөр зөвхөн төрийн төдийгүй, католик шашны хувьд ч хүндэтгэлт өдөр юм. Түүнчлэн энэ өдөр Унгарчууд ургацын баяр буюу Шинэхэн талхны өдөрлөгөө зохион байгуулдаг байна.

Парламентын ордны өмнө хүндэт харуул Унгарын үндэсний далбааг өргөснөөр албан ёсны баяр эхэлдэг уламжлалтай. Уг ёслолд ерөнхийлөгч хатагтай Каталин Новак, засгийн газрын гишүүд, гадны элч төлөөлөгчид мөн тангараг өргөх хоёр зуу орчим офицерууд оролцсон бөгөөд ерөнхийлөгч хатагтай Новак хүндэт иргэдэд Гэгээн Стефаны одон болон Унгарын Гавъяаны загалмай одонг тус тус гардуулсан юм.

Базилика сүмд хүндэтгэн залсан Унгарын үндэсний хийгээд, Католик шашинтны шүтээн, Гэгээн Стефаны Ариун баруун гарыг хүндэтгэх жагсаал өргөн дэлгэр болж өнгөрлөө. Жагсаалд оролцсон иргэдийн сэтгэгдлийг сонслоо.

Улс даяар өргөн дэлгэр тэмдэглэх энэхүү баярт зориулан Унгар үндэсний хоолны өдөрлөг, поп, сонгодог хөгжмийн концерт, гэр бүл, хүүхдэд зориулсан үйл ажиллагаанууд 8.18-нд эхэлсэн бөгөөд 8.21 хүртэл үргэлжилж байна. Нийт 18 баярын талбайд 150 орчим уран бүтээлчид оролцохоор бэлтгэсэн байна.

Энэхүү өдөрлөг концертууд нь унгар улсын үндэсний түүх, соёл, онцлогийг залуу үедээ таниулах, олон нийтэд сурталчилах зорилготой бөгөөд зохион байгуулагчид өмнөх жилүүдийнхээс олон жуулчин хүлээн авна хэмээн тооцоолж байна. Дашрамд дурдахад өнгөрсөн жил уг баярыг үзэж сонирхохоор хоёр сая орчим жуулчин Унгар улсад ирсэн байна.

Мэдээ бэлтгэсэн: С.Бүжинлхам, Т.Золжаргал

#MNB

‍