Унгар улс дахь Монголчууд Үндэстний их баяр наадмаа өргөн дэлгэр тэмдэглэн өнгөрүүллээ. Цар тахлын улмаас баяр наадмаа тэмдэглэлгүй хоёр жил завсарласан хэдий ч Унгар улсын нийслэл Будапешт хотноо Монгол төрийн далбаагаа мандуулж, Монгол улсаас Унгар улсад суугаа онц бөгөөд бүрэн эрхт элчин сайд С.Баатаржав баяр наадмыг нээж үг хэлснээр Унгар улс дахь Монголчуудын баяр наадам ёслол төгөлдөр эхлэлээ.

Энэ жилийн баяр наадмын нээлтийн тоглолтыг домог хамтлагийн ахлагч морин хуурч хөөмийч МУСТА Б.Бат-Орших, уртын дууч Т.Янжиндулам болон Дүнжингарав хамтлаг “Уяхан замбуу тивийн наран” уртын дуугаар наадмыг нээсэн юм. Унгар дахь Монголчуудын баяр наадамд гадна дотны 400 гаруй хүн оролцлоо. Будапешт дэх Монголчуудын наадмын зүлэг ногоон дэвжээнд хүчит 32 бөх зодоглосноос залуу бөх Б.Бат-Эрдэнэ түрүүлж, залуу бөх Д. Бат-Эрдэнэ үзүүрлэлээ. Сур харваанд нийт 20 гаруй залуус оролцож цэц мэргэнээ сорьсноос Н.Мөнхбат түрүүлсэн бол шагайн харваанд Д.Лханаасүрэн, шатрын тэмцээнд Б.Пүрэвбаатар нар тус тус тэргүүн байр эзэллээ.

Унгар улсад 5 мянга гаруй Монгол хүн ажиллаж, суралцдаг. Унгарт суралцаж буй оюутан залуус наадамд өргөнөөр оролцсоноос гадна мөн Монгол судлаач эрдэмтэд, гадны иргэд ч Монголчуудын наадмыг үзэж сонирхлоо. Мөн Унгар улсад ажиллаж амьдарч буй уран бүтээлчид болох бүжиг дэглээч Н.Хонгорзул, Ц.Наран-Эрдэнэ, аравт хамтлагийн дуучин Л.Нямдорж болон оюутан залуус өөрсдийн уран бүтээлээ наадамчин олонд хүргэллээ.

Эх орноосоо хол байгаа Монголчууд ийнхүү нэг өдөр Монгол өв соёл, ёс заншлынхаа дор нэгдэж, эх орноо ганыханд ч таниулан сурталчиллаа. Энэ удаагийн наадамд Унгар улсад үйл ажиллагаа явуулж буй төрийн бус байгууллага болох Унгар дахь Монголчуудын хамтын холбоо, Унгар дахь Монгол оюутны холбоо, Унгар дахь холбоод нэгдэн оролцсоноороо онцлог байсан бөгөөд наадам өнгөтэй сайхан боллоо.

Мэдээг бэлтгэсэн Т.Золжаргал, С.Бүжинлхам.

#MNB